Numbers 35

Levi-te ading Khuapite

1Jericho b pana kantanna Jordan gungei Moab zangleite tungah TOPA in Moses tungah, 2“Israel-te in luaha a neih ding uh sung panin Levi-te ten nading khuapite a piak dingun Israel-te thu pia in. Khuapite kima a lonona munte zong amaute pia in. 3Tua ciangin amaute in a ten nading uh khuapi le a tuuhon a bawnghonte uh le a ganhing khempeuh uh adingin lonona mun nei pan ding uh hi.

4 “Levi-te na piak khuapite kima lonona mun, khuapi kulh panin pi c tul le zanga a huam ding hi. 5A khuapi pualam ah nisuahna-lam pang pi d tulthum, leitaw-lam pang pi tulthum, nitumna-lam pang pi tulthum le leilu- lam pang pi tulthum tehin a khuapi a laizangah a om ding hi. Amaute in hih mun teng khuapi lonona munin a nei ding uh hi.

Bukna Khuapi

6 “Levi-te na piak uh khuapite lakah guk, mi khatpeuh a thatkha mipa buk nading khuapi hi ding hi. Khuapi sawmli le nih amaute piak thuah lai un. 7Levi-te a lonona tawh na piakkhawm pelmawh ding uh a vekin khuapi sawmli le giat hi ding hi. 8Israel-te neihsa panin Levi-te na piak uh khuapite no bawng’ ciatciat luah zah tawh kituakin na pia ding uh hi. Khuapi tampi a nei bawng’te tung panin tampi la-in, ahi hangin a tawm neite tungah na tawm lak ding uh hi,” a ci hi. ^a

9 Tua ciangin TOPA in Moses kiangah, 10“Isreal-te hopih inla amaute kiangah, ‘Jordan kantanin Canaan ah na lut uh ciangin 11mi khatpeuh a thatkha mi khat a suahtak theih nadingin, na khuapite panun khuapi pawlkhat teelkhia un. 12Thu kikhen dingin mihonpite mai-ah a din ma-in mi that khate a sih loh nadingin phulapa panin bukna munah kikoih ding hi. 13Na piak uh hih khuapi gukte note bukna khuapi hi ding hi. 14Jordan hihlam galah thum, Canaan lam galah thum mah bukna khuapi-in pia un. 15Sawmkhol lopi a midang khat a that khate tua munah a suahtak theih nadingin hih khuapi gukte, Israel-te pemtate le amau laka a teng mi peuhmah adingin bukna khuapi hi ding hi. ^b

16 “‘Mi khat in na-a kizang sik khatin mi khatpeuh a si dingin a sat leh amah mi that ahi hi; tua mi thatpa kithat ding hi. 17Ahikeh mi khat in mi thah theih nading suangtum khat a khutah tawi-a, mi khatpeuh a si dingin tupna-a a neih leh amah mi that ahi hi; tua mi thatpa kithat ding hi. 18Ahikeh mi khatpeuh in thah theih nadingin a khut sungah na-a kizang sing khat tawi-a, a sih nadingin mi khatpeuh a sat leh amah mi that ahi hi; tua mi thatpa kithat ding hi. 19Sisan phulapa in mi thatpa a that ding hi; amah a tuahkhak ciangin a that ding hi. 20Mi khatpeuh in sawmkhol lopi-in a sih nadingin suang ahikeh bang khatpeuh in a den a, 21ahikeh galbawlin a sih nadingin khuttumin a tup leh tua mipa kithat ding hi; amah mi that ahi hi. Sisan phulapa in mi thatpa a tuah khak ciangin a that ding hi. ^c

22 “‘Ahi hangin galbawl lopi-a mi khatpeuh in midang khat sun vat ahikeh bukbawl loin na khatpeuhin deng 23ahikeh amah mu lopi-in a sih theih nading suangtum khat khiatkha a, amah a sih leh tua ciangin amah a galpa hi loin amah liamsak a sawm ahi loh nungsangin 24mipite in hih ding ngeina tawh kizui-in amah le sisan phulapa kikalah thu a khen ding uh hi. 25Mipi in sisan phulapa panin mi that-a kingawhpa hu pelmawh ding uh a, amah a taina bukna khuapi ah paikiksak ding uh hi. Sathau siangtho a kinilh tulpipa a sih matengin tua lai-ah a teng ding hi. ^d

26 “‘Ahi hangin a kimawhsakpa, a taina mun bukna khuapi-a a kiciangtanna mun pualam ah a pai-a, 27khuapi pualam ah sisan phulapa in a muh leh mi that mawhsakna om loin sisan a kimawhsakpa that thei hi. 28Tulpipa a sih matengin a kimawh-sakpa ama bukna khuapi ah a teng ding hi; tulpipa a sih ciang bekin ama neihsa munah ciah kik thei pan ding hi.

29 “‘Hong tung ding na tu na ta khangun hihte na tenna mun peuhpeuh uah note adingin a kisam ding ngeinate ahi hi.

30 “‘Mi khat in midang khatpeuh a thah leh tecite genna siksan bekin mi thatpa kithat ding hi. Ahi hangin teci khatbek genna siksanin khat beek a kithat kei ding hi. ^e

31 “‘A si dinga kisehsa mithatpa nuntakna kitatna sum na sang kei ding uh hi. Amah pel loin kithat taktak ding hi.

32 “‘Bukna khuapi-a a taisa mi khatpeuh, tulpipa a sih ma-in ama neihsa gamah ciah-a a ten nading phalna-in tatna sum na sang kei ding uh hi.

33 “‘Note omna gam na ninsak kei ding uh hi. Sisan luansakna in leitang ninsaka, sisan a kiluansak nasa leitang ah khatpeuh sisan mah a luan kei ngal leh mawhna thoihdamna kibawl thei lo hi. 34Keimah TOPA Israel-te lakah teng ka hi manin keima omna, note tenna leitang ninsak kei un,’ ci-in gen in,” a ci hi. ^f